As imaxes e as cousas

Vanesa Abelairas é unha moza artista cuxa obra, polo menos a que este mes presenta en Foeminas, habita nos límites daquilo que indefectiblemente se lle escapa.
Vanesa explora o interior mesmo da imaxe coa intencionalidade de achar un epicentro, coa idea fixa de atopar unha resposta diferente. Acaso unha experiencia distinta do mundo que a rodea. Por iso as súas fotografías sitúanse no bordo, nas fronteiras, inverten sutilmente a esencia das cousas. Sen avanzar de fronte cara á matriz.
Ela comprende perfectamente o difícil que é arribar ao todo. Por iso, atravesa os acontecementos desde as lindes, desde un costado. Sinalando deste xeito o inaprensible e arbitrario do universo.
Aí descobre os nichos, as prazas, as estradas, a arquitectura, as imaxes dentro das imaxes... Así, deste xeito tan particular, amósanos a súa desconcertante e absolutamente necesaria, mirada fotográfica.

                                                                        Micaela Fernández Darriba

Vanesa Abelairas

Lugo 1976.
Cursa estudos de Talla de madeira e de Fotografía artística na Escola Superior de Deseño Ramón Falcón de Lugo.
Participa en diversas exposicións colectivas e individuais como o Certame Cidade de Lugo e Durmientes na sala Wootelo de Lugo.
Traballou como colaboradora do xornal El Progreso de Lugo e o Estudo de Deseño e Comunicación TaTaTa.
Viviu recentemente en Porto onde desenvolveu a maior parte da súa obra fotográfica. Actualmente vive e traballa en Coruña.